ڕێگای کوردستان
پرسی ئاڵوگۆڕی پۆستی پارێزگاری کەرکوک بووەتە پرسێکی گەرم و مشتومڕێکی زۆری لە میدیاکان و ناوەندە سیاسییەکاندا دروست کردووە.
بەپێی ئەو دەنگۆیانەی بڵاوکراونەتەوە، باس لە بوونی ڕێککەوتنێکی سیاسی دەکرێت لەنێوان یەکێتیی و حزبی تەقەدوم، بە مەبەستی ڕادەستکردنی پۆستی پارێزگاری کەرکوک بە بەرەی تورکمانی.
لە بەرامبەر ئەم بڵاوبوونەوە فراوانەی هەواڵەکە، ڕێبوار تەها، پارێزگاری کەرکوک، لە لێدوانێکی ڕۆژنامەوانیدا ڕاستەوخۆ وەڵامی ئەو دەنگۆیانەی دایەوە و ڕایگەیاند، ئەو بابەتانەم تەنها لە ڕێگەی میدیاکانەوە بیستووە و تاوەکو ئێستا بە فەرمی هیچ زانیاری یان بڕیارێکی لەو شێوەیەم پێ نەگەیشتووە.
ئەم پرسە لە کاتێکدایە کە کەرکوک بەهۆی پێگە ستراتیژییەکەیەوە، هەمیشە لە چەقی ململانێ و هاوکێشە سیاسییەکاندا بووە، لە ئێستاشدا پرسی مانەوە یان گۆڕینی پارێزگار، یەکێکە لەو بابەتە هەستیارانەی کە میدیای کوردی و عێراقی بە بایەخێکی زۆرەوە وەک سەردێڕی هەواڵەکان مامەڵەی لەگەڵدا دەکەن، لە چاوەڕوانی هەر پێشهاتێکی فەرمیدا.