لە ڕاگەیەندراوێکی هاوبەشدا، هەر سێ وڵاتی سعودیە، تورکیا و پاکستان شەوی دووشەممە دامەزراندن و کارپێکردنی سیستەم و هێزی بەرپەرچدانەوەی بەکۆمەڵیان لە خاکی سعودیە ڕاگەیاند.
لە بەیاننامە فەرمییەکەدا، سێ وڵاتەکە جەختیان لەوە کردەوە کە "ئاسایشی هەر دەوڵەتێکی ئەندام لە هاوپەیمانیەتییەکەدا، بەشێکی دانەبڕاوی ئاسایشی هەرسێ دەوڵەتە".
خاڵە سەرەکییەکانی بەیاننامەکە:
- جێبەجێکردنی خێرای بەرگریی هاوبەش: دەستبەجێ دەست بە جێبەجێکردنی پابەندییەکانی بەرگریی هاوبەش، دابینکردنی هێز و توانای سەربازی و بڵاوکردنەوەی بەپەلەیان لە سعودیە دەکرێت.
- پێشوازی لە توانا سەربازییەکان: تورکیا و پاکستان ستایشی ئامادەیی و توانای هێزەکانی سعودیان لە ڕووبەڕووبوونەوەی هێرش و هەڕەشەکاندا.
- سەرکۆنەکردنی هێرشەکان: هاوپەیمانیەتییەکە بە توندی سەرکۆنەی ئەو هەوڵانە دەکات کە شارە پیرۆزەکانی مەکە و مەدینە، و دامەزراوە مەدەنی و ئابوورییەکانی سعودیەیان کردووەتە ئامانج.
- پۆستە فەرمییەکان: دامەزراندنی فەریق (خانەنشین) نوعمان مەحموود لە پێگەی ئەمینداری گشتیی هاوپەیمانیەتییەکە بۆ ماوەی سێ ساڵ ڕاگەیەندرا.
دۆخی مەیدانی و پەیوەندی بە ڕووداوەکانەوە:
ئەم ڕاگەیەندراوە هاوبەشە لە کاتێکدایە کە دوو ڕۆژە حکومەتی یەمەن، بە پشتگیریی سعودیە، هێرشێکی بەرفراوانی دژی چەکدارانی حوسی دەستپێکردووە و تێیدا توانیویەتی چەندین ناوچە، لەوانەش گه‌رووی ستراتیژیی باب مەندەب، کۆنتڕۆڵ بکاتەوە.
