ڕزکار بابان
١ی ژانویەی ٢٠٢٦
🔴لەگەڵ تێپەڕبوونی هەر ساڵێکدا، ئاهەنگ دەگێڕین بەبۆنەی کۆتایی هاتنی ساڵێک و دەستپێکی ساڵێکی دیکە، هیواکانمان لەسەر ساڵنامەیەکی گۆڕاو دەچەسپێنین و بەڵێنی گۆڕانکاری کەسی و کۆمەڵایەتی بەخۆمان دەدەین. بەڵام پرسیارە بنەڕەتییەکە ئەوەیە: ئایا تەنها گۆڕینی ژمارەی ساڵ بەسە بۆ دروستکردنی گۆڕانکاری ڕاستەقینە؟ یان گۆڕانکاری قووڵ و ڕاستتر لەوەدایە کە تا چەند عەقڵ و بیرکردنەوەی بەکۆمەڵمان دەگۆڕێت؟
🔷ئاهەنگگێڕان : ڕێوڕەسمێکی ڕەمزییە یان هێزێکی بزوێنەر؟
گرنگی دەروونی و کۆمەڵایەتی ئاهەنگی سەری ساڵ نکۆڵی لێناکرێت. نوێنەرایەتی ساتێکی بیرکردنەوەی بەکۆمەڵ دەکات لەسەر تێپەڕبوونی کات، دەرفەتێک بۆ پێداچوونەوە و نوێبوونەوە و وەرچەرخانێکی ڕەمزی کە هاندەری دانانی ئامانجەکانە. بەڵام مەترسییەکە لە کورت کردنەوەی گۆڕانکاریدایە لەم ڕێوڕەسمە ساڵانەیەدا، پشتگوێخستنی ئەو ڕاستییەی کە گۆڕانکاری ڕاستەقینە پرۆسەیەکی بەردەوام و کەڵەکەبووە، نەک ئاهەنگێکی کات و ساتی بەستراوو بە گۆڕینی ساڵنامەیەکەوە.
🔷گۆڕانکاری ڕاستەقینە: لە فۆرمەوە بۆ کرداری
مێژوو پێمان دەڵێت کە کۆمەڵگاکان کاتێك دەگۆڕدرێن عەقڵی ئەندامەکانیان بگۆڕدرێن، کاتێک بیرکردنەوەی بەکۆمەڵ دەگۆڕدرێن و کاتێک چەمک و بەهاکان دووبارە داڕێژرێنەوە. ساڵی ڕۆژمێری دوای جووڵەی زەوی بە دەوری خۆردا دێت، بەڵام پێشکەوتنی کۆمەڵگاکان بەدوای ئەم خولە فەلەکییەدا نایەت. بەڵکو پەیڕەوی لە سووڕەکانی بیرکردنەوە و ئیرادە و دەستکەوت دەکات.
هەموو گۆڕانکارییە گەورەکانی مێژووی مرۆڤایەتی- لە ڕۆشنگەرییەوە تا شۆڕشی پیشەسازی تا سەردەمی زانیاری- لە یەکەم ڕۆژی سەری ساڵی نوێووە دەستی پێنەکردوە . بەڵکو بە بییر کردنەوەو پریشکێکی فیکری دەستیان پێکردوە ، بە پرسیارێک کە تەحەدای نەزمی دامەزراو کۆمەڵگەی دەکرد، بیرۆکەیەکی نوێی بییرمەندێك کە بوێری ئەوەی هەبووە سەرپێچی لە داب و نریتە کۆنەکانی کۆمەڵگە بکات.
🔷کۆمەڵگاکانمان: لە نێوان نەریت و نوێبوونەوە
لە کۆمەڵگا عەرەبی و ئیسلامییەکانماندا دوو ساڵنامەمان هەیە: کۆچی و زاینی، هەردووکیان دەرفەتی بیرکردنەوە و نوێبوونەوە دەڕەخسێنن. بەڵام گرنگتر لەوەی ئاهەنگ بگێڕین بۆ گۆڕانی ساڵ، پرسیارکردنە: ئایا بیرکردنەوەی بەکۆمەڵمان لە ماوەی ساڵی ڕابردوودا گۆڕاوە؟ ئایا لە پێوەرەکانی بیرکردنەوە و داهێنان و گفتوگۆی بنیاتنەردا پێشکەوتووین؟ ئایا ئێمە زیاتر لێبوردە و بەرهەمدارتر و زیاتر ئاگاداری تەحەددیات و دەرفەتەکان بووین؟
🔴بەرەو گۆڕانی ڕاستەقینە
🔷با سەرەتای ساڵی نوێ بکەینە ووێستگەو بنەمایەکی گرنگ بۆ بەدەستهێنانی زەبری گۆڕانی ڕاستەقینە، لەڕێگەی:
1- هاندانی بیرکردنەوەی ڕەخنەگرانە لە کۆمەڵگاکانماندا، لەبری دژایەتی و جنێودان و گوێڕایەڵی کوێرانە.
- پەرەپێدانی کلتوری گفتوگۆ کە ڕێز لە جیاوازیەکان بگرێت و سوودی لێ وەربگرێت.
3- وەبەرهێنان لە پەروەردەیەکدا بکەین کە عەقڵ ئازاد بکات نەک سنووردار و لەناووی ببات.
- پێشخستنی بەها ئەرێنییەکانی وەک داهێنان و دەستپێشخەری و بەرپرسیارێتی کۆمەڵایەتی.
- هەڵسەنگاندنەوەی ئەولەویەتەکانمان وەک تاک و کۆمەڵگا، و گواستنەوە لە گرنگیدان بە فۆرماڵیزمەوە بۆ گرنگیدان بە کرداریەکان.
👈لە کۆتاییدا دەڵێم سەفەرێکە نەک ساتێک. سەرەتای ساڵی نوێ ڕەنگە ساتێکی گونجاو بێت بۆ دەستپێکردنی گەشتەکە، بەڵام خودی گەشتەکە پێویستی بە بەردەوامی و هەوڵی ڕۆژانە هەیە. گۆڕانی ڕاستەقینە ڕووداوێک نییە کە ساڵانە جارێک ئاهەنگی بۆ دەگێڕین، بەڵکو پرۆسەیەکی کەڵەکەبووی گەشەسەندنی فیکری و کۆمەڵایەتییە.
👈با ئەم ساڵی نوێیە بکەینە دەرفەتێک بۆ ئەوەی بیر لە ئەولەویەتەکانمان بکەینەوە، وە با کار لەسەر گۆڕینی کۆمەڵگاکان بکەین بە سەرەتای گۆڕینی عەقڵ. چونکە مێژوو ئەو ساڵانەی کە تێپەڕیون باس ناکات، بەڵکو ئەو بیرۆکانە باس دەکات کە ڕەوتی مرۆڤایەتییان گۆڕیوە، و ئەو ئەزموونانەی کە کۆمەڵگاکانیان گواستەوە بۆ ئاستێکی نوێی هۆشیاری و شارستانییەت.
👈گۆڕانکاری ڕاستەقینە لەو کاتەوە دەست پێدەکات کە واز لە چاوەڕوانی گۆڕانی ساڵنامە بهێنین، و لە ناوەوە دەست بکەین بە گۆڕینی خۆمان و کۆمەڵگاکانمان.
