مارک ساڤایا، نێردەى تایبەتی ئەمریکا لە عێراق، کەمێک لەمەوبەر، لە تۆڕی کۆمەڵایەتیی ئێکس ڕایگەیاند: دوای تێپەڕبوونی بیست و سێ ساڵ بەسەر ڕووخانی دیکتاتۆریدا، عێراق جارێکی دیکە لە بەردەم وەرچەرخانێکی یەکلاکەرەوەدا وەستاوە. دەرفەتێکی مێژوویی بۆ وڵات ڕەخسا بۆ ئەوەی دامەزراوەکانی بنیات بنێتەوە و ئایندەیەکی گەش مسۆگەر بکات. لەگەڵ ئەوەشدا، هیچ نەتەوەیەک ناتوانێت سەرکەوتوو بێت لە سایەی بوونی گرووپی چەکدار کە ڕکابەریی دەوڵەت دەکەن و دەسەڵاتەکەی لاواز دەکەن. ئەم دابەشبوونە بووەتە هۆی لاوازکردنی پێگەی جیهانیی عێراق، خنکاندنی ئابوورییەکەی و سنووردارکردنی توانای بۆ پاراستنی بەرژەوەندییە نیشتمانییەکانی.
لە ماوەی سێ ساڵی ڕابردوودا، عێراق سەلماندی کە سەقامگیریی ڕاستەقینە دەکرێت بەدی بێت کاتێک حکوومەت پەیڕەوی ڕێبازێکی واقیعبینانە و هاوسەنگ دەکات کە وڵات لە ململانێ هەرێمییەکان بەدوور دەگرێت و سەرنج دەخاتەوە سەر ئەولەویەتە نیشتمانییەکان. نابێت ڕێگری لەم ڕێڕەوە تازەیە بکرێت. سەقامگیری پێویستی بە سەرکردایەتییەکی بەرپرس، یەکڕیزی لە ئامانج، و پابەندبوونێکی پتەو بە بەهێزکردنی دەوڵەت و دامەزراوەکانییەوە هەیە.
ئەمڕۆ، لە کاتێکدا عێراق یادکردنەوەی هەشتەمین ساڵڕۆژی سەرکەوتنی بەسەر داعشدا دەگێڕێت و بە سەرکەوتوویی کۆتایی بە هەڵبژاردنەکانی پەرلەمان دەهێنێت، بەرپرسیارێتیی تەواو دەکەوێتە ئەستۆی سەرکردە سیاسی و ئاینییەکانی وڵات. بڕیارەکەیان لە ماوەی داهاتوودا دیاری دەکات کە ئایا عێراق بەرەو سەروەری و هێز هەنگاو دەنێت یان جارێکی دیکە بەرەو لێکترازان و داڕمان دەخلیسکێت.
هەڵبژاردنێکی یەکگرتوو و ژیرانە پەیامێکی ڕوون و ئاشکرا بۆ ویلایەتە یەکگرتووەکان و کۆمەڵگەی نێودەوڵەتی دەنێرێت بەوەی کە عێراق ئامادەیە بۆ وەرگرتنی پێگە شایستەکەی وەک دەوڵەتێکی سەقامگیر و ڕێزلێگیراو لە ڕۆژهەڵاتی ناوەڕاستی نوێدا. بەڵام جێگرەوەکە (بەدیلەکە) بە هەمان ئەندازە ڕوونە: داڕمانی ئابووری، ئاڵۆزیی سیاسی، و گۆشەگیریی نێودەوڵەتی.
لە سایەی سەرکردایەتیی سەرۆک ترەمپدا، ویلایەتە یەکگرتووەکان لە ئامادەباشیدایە بۆ پشتیوانیکردنی عێراق لەم قۆناغە هەستیارەدا. من و تیمەکەم لە شارەزایانی خاوەن ئەزموونی باڵا پابەندین بە کارکردنی نزیک لەگەڵ سەرکردە عێراقییەکان لە هەفتە و مانگەکانی داهاتوودا بۆ یارمەتیدان لە بنیاتنانی دەوڵەتێکی بەهێز، ئایندەیەکی سەقامگیر، و عێراقێکی خاوەن سەروەری کە توانای دیاریکردنی چارەنووسی خۆی هەبێت لە ڕۆژهەڵاتی ناوەڕاستی نوێدا.
